रूपाकोट संवाददाता–
खोटाङ, कात्तिक १३–एक करोड बढी खर्च गरेर दिक्तेल बजारमा राखिएका सडक बत्ती बिग्रिएपछि नगरपालिकाले मर्मत नगरेको भन्दै स्थानीयले गुनासो गरेको छन् । सदरमुकामजस्तो ठाउँमै सडक बत्ती नहुदा सास्ती खेप्नु परेको गुनासो गरेका हुन् ।
दिक्तेल रूपाकोट मझुवागढी नगरपालिकाले आर्थिक वर्ष २०७६÷७७ मा एक करोड १४ लाख ७८ हजार खर्च गरेर ठेक्का मार्फत दिक्तेलका विभिन्न ठाउँहरूमा सोलार प्रविधिको सडक बत्ती राखेको थियो । उक्त ठेक्का ललितपुर बागडोलस्थित बिराट इनर्जी प्रालिले लिएको थियो । तर दुई वर्ष नबित्दै बिग्रिएपछि आर्थिक वर्ष २०७८÷७९ मा चार लाख ६० हजार खर्च गरेर मर्मत गरिएको थियो । मर्मतको काम भने कोठेसन मार्फत गरिएको थियो । विराटनगरस्थित पूर्वाञ्चल इनर्जी सप्लायर्स प्रालिले घटाघट कोटेसनमा काम लिएर मर्मत गरिए पनि केही समय बलेर बन्द भएको दिक्तेल बजारबासीको दुःखेसो छ । सदरमुकाममै सडक बत्ती नबाल्नु जनताप्रतिको अपमान हुनका साथै नगरपालिकाको कार्यक्षमताप्रति प्रश्नचिन्ह खडा भएको स्थानीयको गुनासो छ ।
हाटडाडाँ क्षेत्रमा भानुचौकमा एउटा मात्र बत्ती बल्छ । हाटडाडाँबाट लफ्याङ जाने सडक, मझुवागढी जाने पदमार्ग लगायतमा राखिएका वत्ती बल्न छाडेको स्थानीयको गुनासो छ ।
नेपाल टेलिकम, जिल्ला प्रहरी कार्यालय, शंखधर साख्वा चौक, पोखरी लाइनमा पनि सडक बत्ती बल्न छाडेको स्थानीयको दुखेसो छ । मर्मतका लागि नगरपालिकाका कर्मचारीले सडक बत्तीको बेट्री निकालेर लगेको तर अहिलेसम्म मर्मत नभएको पोखरी टोलका रोहित सैंजूले बताए ।
किरात चौकमा एउटा, रत्नपार्क क्षेत्रमा एउटा र संगम टोलमा दुई वटा बाहेक अरु नबल्ने स्थानीयको भनाई छ । त्यस्तै मानवअधिकार चौक, बेस क्याम्पमा राखिएको सडक वत्ती पनि बल्न छाडेको स्थानीय नेत्र कटवालको भनाई छ ।
त्रिवेणीचौकदेखि भवन गैरासम्मको सडक वत्तीमध्ये हुलाकडाडाँनेरको एउटा मात्र सडक बत्ती बल्छ । हेलिप्याडको सडक बत्तीको बेट्री पनि नगरपालिकाका कर्मचारीले लगेको तर अहिलेसम्म बत्ती नबलेको समुद्र जोशीको भनाई छ ।
हस्पिटल चौकदेखि आचार्यगाउँसम्मको सडकमा राखिएका पाँच वटा सडक वत्ती मध्ये तीन वटा बल्न छाडेको स्थानीय पृथ्वीनारायण आचार्यको गुनासो छ ।
दिक्तेल बजारमा एक सय ५० वटा वत्ती राखिएको थियो । सडक बत्ती नबलेपछि आएका जनगुनासोप्रति नगरपालिकाको गम्भिर ध्यानाकर्षण भएको नगर उपप्रमुख विसन राईले बताएका छन् । अघिल्लो कार्यकालमै सौर्य प्रविधिको बत्ती जडान गरिएको र यसलाई मर्मत गर्दा नयाँ किन्नु भन्दा महङ्गो पर्ने भएकाले वैकल्पिक बत्ती राख्नका लागि दश लाख बजेट विनियोजन गरिएको समेत उपप्रमुख राईको भनाई छ ।
