रूपाकोट संवाददाता–
खोटाङ, साउन २२–हामी धेरैलाई लाग्ला युवाहरू गफ मात्र चुटेर हिड्छन् । तर त्यसो होइन, सिर्जनशील काममा पनि उनीहरू उत्तिकै लागेका छन् । पछिल्लो समयमा त राजनीतिमा लागेका अधिकांश युवाहरू पेशा व्यवसायमा जोडिएका छन् ।
तरुण दल खोटाङका सभापति काजीमान राई राजनीतिसंगै निर्माण व्यवसायमा आबद्ध छन् । राजनीतिका लागि खर्च जोहो गर्न निर्माण व्यवसायमा लागेको बताउँछन् ।
राईका अनुसार तरुण दल खोटाङमा करिब ११ सयको हाराहारीमा युवाहरु आबद्ध छन् । यसमध्ये रोजन राई, भीषण राई, दिनेश राई, सतेन्द्रसिं ठकुरी, सञ्जयकुमार राई र जयकुमार तामाङ तरुण दल केन्द्रीय सदस्य हु्न । उनीहरूमध्ये भीषण राई नाम चलेका निर्माण व्यवसायी हुन् । तरुण दलमा आबद्ध युवाहरूमध्ये करिब ६५ प्रतिश्त युवा विभिन्न पेशा व्यवासयमा आबद्ध छन् ।
त्यस्तै एमाले भातृ संगठन युवा संघ नेपालका जिल्ला अध्यक्ष रोसन राई कोशी प्रदेश सामाजिक विकास मन्त्रीका स्वकीय सचिव हुन् । स्वकीय सचिव लगायत उनी निर्माण व्यवसायी र मोटरसाइकल वर्कसप सञ्चालक पनि हुन् । यसबाट मासिक ८०–९० हजार रूपैयाँको हाराहारीमा कमाइ हुने राईको भनाई छ । त्यसै युवा संघ खोटाङका सचिव विज्ञान राई पनि जिल्लामा नाम चलेका निर्माण व्यवसायी हुन् । उनले भने–वार्षिक २०–२५ लाख मुनाफा हुन्छ ।
युवा संघ सचिवालय सदस्य नवराज रिजाल पनि क्रसर उद्योगी हुन् । यसबाट राम्रै आम्दानी हुने गरेको रिजाल बताउछन् । युवा संघ दिक्तेल रूपाकोट मझुवागढी नगर कमिटी अध्यक्ष कविराज रिजाल पनि होटल व्यवसायी हुन् । उनीहरू लगायत युवा संघ खोटाङमा आवद्ध ६१ मध्ये १५–२० जना विभिन्न पेशा व्यवसायमा आबद्ध रहेको छन् । अन्य २० जना विदेश पलायन भएको रोशनको भनाइ छ । खोटाङको दशै स्थानीय तहका युवा संघमा करिव पाँच सयको हाराहारीका युवाहरू आबद्ध रहेको राई बताउछन् ।
वाइसीयल नेपाल केन्द्रीय सचिवालय सदस्य तथा वाइसीयल खोटाङका इन्चार्ज किसान राई पनि राजनीतिको साथ–साथै विभिन्न व्यवसाय सञ्चालन गर्छन् । उनी कृषि, जडिबुटी, वन पैदावर, निर्माण व्यवसायमा आबद्ध छन् । यसबाट वार्षिक १५–२० लाख आम्दानी हुने राई सुनाउछन् ।
त्यस्तै वाइसीयल नेपाल खोटाङका अध्यक्ष भूपेन्द्र राई पनि व्यवसायमै आबद्ध छन् । त्यस्तै वाइसीय नेपालका पूर्व केन्द्रीय सदस्य शरद राई जिल्लामा नाम चलेका युवा निर्माण व्यवसाय हुन् । यसबाहेक वाइसीयलका पूर्व नेताहरू प्रभात राई, लेख रम्तेल, चेवन बुढाथोकी, जीवनज्योति राई लगायत निर्माण तथा अन्य पेशा व्यवसायमा आबद्ध छन् । वाइसीयलमा करिब पाँच सय बढी युवा आबद्ध रहेको वाइसीयल खोटाङका अध्यक्ष भूपेन्द्र राईले बताएका छन् ।
जिल्लामा राजनीतिक दल बाहेकका युवाहरू पनि विभिन्न पेशा व्यवसायमा आवद्ध छन् । कुल जनसंख्या एक लाख ७५ हजार दुई सय ९८ मध्ये ७० हजार युवा छन् । यसमध्ये ११ हजार दुई सय सात जना युवा विभिन्न मुलुकमा रोजगारीका लागि गएको जिल्ला निर्वाचन कार्यालय खोटाङको रेकर्डमा उल्लेख छ । तर यो भन्दा बढी करिब चालीस हजार जति युवा विदेशिएको हुन सक्ने नेपाल चेम्बर्स अफ कमर्श खोटाङका अध्यक्ष खुसनारायण सैंजूको भनाइ छ । बाँकी केही खेती किसानी, केही सानोतिनो पेशा व्यवसाय र केही कर्मचारी छन् । युवालाई स्वदेशमै रोजगारी सिर्जना गरे मात्र समृद्धि हासिल हुने भएकाले यसप्रति स्थानीय सरकारको ध्यान जानु पर्ने सैजूको भनाइ छ ।
