रूपाकोट संवाददाता–
खोटाङ, साउन २३–जिल्लाको उत्तरी क्षेत्र केपिलासगढी गाउँपालिकामा भिर माहुरी फैलिन थालेको छ । उक्त पालिकाको वडा नं १ फेदी, ७ सुङ्देल र ६ दिप्सुङमा भिर माहुरी फैलिएको हो ।
फेदीमा दुई वर्षअघि मासिन लागेको भिर माहुरी सिकार गर्न प्रतिबन्ध लगाइएपछि फैलिन थालेको वडाअध्यक्ष निरकुमार राईले बताएका छन् । उक्त ठाउँको विभिन्न सामुदायिक वनका भिरहरूमा माहुरी फैलिएको राईको भनाइ छ । भिरमाहुरीले पर्यावरणमा महत्वपूर्ण भूमिका निर्वाह गर्ने भएकाले दुई वर्षअघि नै सिकार गर्न प्रतिबन्ध लगाइएको राईले सुनाएका छन् ।
त्यस्तै उक्त गाउँपालिकाकै वडा नं ७ सुङ्देलमा पनि भिर माहुरी फैलिएको छ । उक्त वडाको बुङ्बुङ्गे सामुदायिक वन, दाइलुबमा सामुदायिक वनका भिरहरूमा प्रसस्त रूपमा भिर माहुरी फैलिएको वडाअध्यक्ष तेजकुमार राईले बताएका छन् । उनका अनुसार १०–१२ वटा भिरमा भिरैभरि माहुरी देखिन्छ । एउटै भिरमा १७ वटासम्म भिरमाहुरीको गोला देखिन्छ ।
त्यस्तै वडा नं ६ दिप्सुङमा पनि भिर माहुरी फैलिएको स्थानीयले बतएका छन् । उक्त वडाको माथिल्लो महभिर र तल्लो महभिरमा भिर माहुरीले गोला लगाउने गरेको वडाअध्यक्ष गोपाल राईले बताएका छन् । भिर माहुरीले जडिबुटीजन्य फलफूलको रसबाट मह बनाउने भएकाले यसको मह औषधीय गुणले भरिपूर्ण हुने भिर माहुरी बारे जानकार फेदीका धनकुमार राईको भनाइ छ । भिर माहुरीले जडिबुडीजन्य फलफूलको रसबाट मह बनाउने भएकाले यसको मह औषधीय गुणले भरिपूर्ण हुने भएकाले यसको मह प्रतिकेजी तीन हजार रूपैयाँसम्म पर्ने राईले सुनाएका छन् ।
उभौली गरी वर्षमा दुई चोटी भिर माहुरीको सिकार गर्ने परम्परा छ । डोरीको सहायताले जोखिमपूर्ण भिरमा पसेर मह सिकार गरिन्छ ।
