रूपाकोट संवाददाता–
खोटाङ, असोज १८–हलेसी तुवाचुङ नगरपालिका क्षेत्रमा अबरुद्ध मध्यपहाडी लोकमार्ग खुलाउन नसक्दा यात्रु अलपत्र परेका छन् । वर्षाका कारण असोज १७ गते राती पहिरोले अबरुद्ध सडक नगरपालिकाले असोज १८ गते दिनभर खुलाउने प्रयास गर्दा नसकेपछि यात्रु अलपत्र परेका हुन् ।
हलेसी तुवाचुङ नगरपालिकाका प्रवक्ता कमल गिरीका अनुसार उक्त नगरपालिकाको वडा नम्बर १ बाहुनीडाडाँको कदुवा क्षेत्रमा पर्ने गोरुमारेमुनिको पहिरो पछाइए पनि त्यसभन्दा मुनि डौठेखोलामाथिको पहिरो हटाउन नसक्दा सडक खुलाउन नसकिएको हो । दुई वटा डोजर प्रयोग गर्दा समेत पहिरो पन्छाउन नसक्दा एक हजार बढी यात्रु अलपत्र परेको गिरीले सुनाएका छन् । पहिरो पन्छाउन नसकेपछि हलेसी, च्यास्मिटार, कदुवा, डौठेखोला लगायतका क्षेत्रमा फसेको ठूला–साना गरी ५० गाडीमा सवार एक हजार बढी यात्रु अलपत्र परेको गिरीले बताएका छन् ।
पहिरो नपन्छाइन्जेलसम्म दुई वटा डोजरले रातभरि काम गर्ने गिरीले जनाएका छन् । उक्त नगरपालिकाकै वडा नं ३ च्यास्मिटारको जोरसिमल नजिक बयक्तको पहिरो भने असोज १८ गते दिउसो पन्छाइएको छ । सडक अबरुद्ध भएपछि काठमाडौं तथा तराईका शहरहरूबाट आएका गाडी जयरामघाट, डौठेखेलामा र दिक्तेल–भोजपुरतिरबाट छुटेको गाडी हलेसी, च्यास्मिटारमा रोकिएका छन् ।
