रूपाकोट संवाददाता–
खोटाङ, जेठ १–सय गन्तव्य सूचीमा रहेको मुन्दुम ट्रेललाई ग्रेटर मुन्दुम ट्रेलको रूपमा विकास गरिएको छ । सप्तकोशीको चतरादेखि खुवालुङ हुदै सगरमाथासम्मलाई ग्रेटर मुन्दुम ट्रेलको रूपमा विकास गरिएको हो ।
मैयुङ ट्याम्के साल्पा सिलिचुङ पर्यटन प्रवद्र्धन केन्द्रले बैशाख ३१ गते प्रेस नोट मार्फत उक्त ‘ग्रेटर मुन्दुम ट्रेल’को विकास गरेको जनाएको हो । केन्द्रका अनुसार सप्तकोशीको चतरा, खुवालुङ हुँदै, भोजपुरको हतुवागढी, गोलमे पहरा, नाग छाँगा, कपासे भन्ज्याङ, तावा भन्ज्याङसम्म लोअर मुन्दुम ट्रेलको रूपमा विकास गरिएको छ । त्यस्तै तावा भन्ज्याङदेखि ट्याम्केडाडाँ हाँसपोखरी साल्पा सिलिचुङ हुँदै महाकुलुङ बुङसम्म मुन्दुम ट्रेल कायम गरिएको छ भने छेस्कामदेखि सगरमाथा बेस क्याम्पसम्म अपर मुन्दुम ट्रेल गरी तीन खण्ड विभाजन गरेर ग्रेटर मुन्दुम ट्रेल विकास गरिएको छ । उक्त ग्रेटर मुन्दुम ट्रेल समुद्री सतहदेखि संसारको सबैभन्दा अग्लो चुचुरोसम्म छोटो दूरीमा पुग्न सकिने भएकाले उपयोगी भएको केन्द्रका अध्यक्ष रमेशकुमार राईले बताएका छन् ।
ग्रेटर मुन्दुम ट्रेलमा प्राकृतिक तथा भौगोलिक रूपमा तराईका समथर भूभागको तातो हावादेखि पहाडको चुचुरोको चिसो तुसारोसम्मको अनुभव गर्न सकिने भएकाले विश्वका पर्यटकको रोजाइमा पर्ने राईको भनाई छ । नेपालका चर्चित चुचुराहरू मेरा पिक, नौलेख, चामलाङ, हुंकु चुली, वरुण से लगायत थुप्रै हिमालहरूको बेस क्याम्प रुटमा पर्दछ । उक्त ट्रेलमा भ्रमण गर्दा संसारको सबैभन्दा अग्लो चुचुरो सगरमाथा सहित कन्चनजङ्घा, मकालु, चोयु, लोत्छे तथा संसारकै सबैभन्दा होचो अरुण उपत्यका लगायत संसारका अग्लो चुचुराको अवलोकन गर्न पाइने राईले सुनाएका छन् । यसबाहेक खोमादिङ भ्याली, हुङयो भ्याली, संसारकै सबैभन्दा अग्लो ट्रेकिङ पास शेर्पेनकोल पास, आमालाप्चा पास, मेराला पास, संखुवासिर पास, मिगेला पास जस्ता थुप्रै पासहरू समेत ग्रेटर मुन्दुम ट्रेल अन्तरगत पर्दछ ।
सांस्कृतिक हिसाबले किराँत समुदायको विशेष सांस्कृतिक स्थलहरू, प्राग ऐतिहासिक स्थलहरू, कला, साहित्य, संगीत, चाडपर्व, रहनसहन, जनजीवन, स्थानीय खानपान र स्थानीय मौलिक वास्तुकलाहरू ग्रेटर मुन्दुम ट्रेलमा देख्न र स्वाद लिन पाइने राईले बताएकाछन । उक्त पदमार्ग चतरा खुवालुङदेखि सुरु गरेर सगरमाथासम्म करिब २३ दिन लाग्ने राईले जनाएका छन् । ग्रेटर मुन्दुम ट्रेल विकासका लागि चतरादेखि सालपा सिलिचुङसम्मको स्वीस सरकारले लगानी गरिरहेको राईले बताएका छन् । अपर ग्रेटर मुन्दुम ट्रेलका लागि समेत स्वीस सरकारलाई अनुरोध गर्ने राईले जनाएका छन् ।
