रूपाकोट संवाददाता–
खोटाङ, चैत ६–दिक्तेल रूपाकोट मझुवागढी नगरपालिका–१० पाथेकामा लोपोन्मुख रेडपाण्डा फेला परेपछि खुसीयाली छाएको छ । दिक्तेल रूपाकोट मझुवागढी नगरपालिकाको टोलीले चैत ४ गते बिहान फेला पारेपछि खुसीयाली छाएको हो ।
आगामी बैशाख १ गते दिक्तेल रूपाकोट मझुवागढी नगरपालिकाले आयोजना गर्ने रेडपाण्डा तथा थार महोत्सवका लागि प्रचार–प्रसार गर्न फोटो तथा भिडिओ खिच्न गएको टोलीले फेला पारेको हो । चैत १ गतेदेखि कोप्चे र मेरुङ सामुदायिक वनमा खोजी गर्दा मेरुङ र कोप्चे सामुदायिक वनको सिमानामा चैत ४ गते विहान ८ बजेर ४० मिनेटमा दुई हजार सात सय ८१ मिटरको उचाईमा फेला पारिएको मेरुङ सामुदायिक वन उपभोक्ता समूहका अध्यक्ष पलमसिं राईले बताए ।
विभिन्न समूह विभाजन गरी रेडपाण्डा खोजी गरिएको थियो । यसमध्ये दिक्तेल रूपाकोट मझुवागढी नगरपालिका–८ बुवालुङका प्रचण्ड राईले सुरुमा देखेका हुन् । त्यसपछि फोटो तथा भिडिओहरू खिचिएका छन् । उक्त रेडपाण्डा करिब अढाई वर्षको भाले भएको स्थानीय तथा मेरुङ सामुदायिक वनका रेडपाण्डा हेरालु पुष्पलाल गिरीले बताए । मेरुङ सामुदायिक वनमा पाँच वटा रेडपाण्डा हुन सक्ने गिरीको भनाई छ । ‘यो क्षेत्रमा करिब पाँच वटा रेडपाण्डा हुनसक्छ भन्ने अनुमान गरिएको छ’–गिरीले भने ।
कोप्चे सामुदायिक वन क्षेत्रमा पनि रेडपाण्डा पाइने रेडपाण्डा हेरालु दिनेश गिरीले बताए । तर कति छन् भन्ने एकीन नभएको गिरीले सुनाए । ‘दिसा हेर्दा कम्तिममा तीन–चार वटा हुन सक्छ’–गिरीले भने ।
रेडपाण्डा फेला परेपछि आगामी बैशाखमा हुने रेडपाण्डा तथा थार महोत्सव थप प्रभावकारी हुने रेडपाण्डा खोजी गर्ने टोलीका संयोजक माधव राईले बताए । ‘रेडपाण्डा भेटिएकोमा खुसी लागेको छ, बैशाखमा हुने रेडपाण्डा तथा थार महोत्सवका लागि थप प्रभावकारी हुने भयो’–राईले भने–‘यसले रेडपाण्डा र थार संरक्षणमा सहयोग पुग्ने छ ।’
रेडपाण्डाको खोजीका लागि वडाअध्यक्ष राई सहित वडा नं १० का वडाअध्यक्ष मुगाधन राई, १२ का वडाअध्यक्ष दानबहादुर राई, नगरपालिकाका लेखाअधिकृत राजकुमार राई, शुभम् फाउण्डेसनका निर्देशक सूर्यबहादुर राई लगायत २८ जनाको समूह चैत १ गतेदेखि खटिएको थियो ।
