रूपाकोट संवाददाता–
खोटाङ, फागुन ४–हलेसी बजारमा आगलागी हुदा तीन घर जलेर नष्ट भएको छ । फागुन ४ गते साँझ सात बजेतिर स्थानीय पदमशेर राईको ग्यास पसलबाट सुरु भएको आगोले तीन वटा घर पूर्ण रूपमा र एउटा घरमा आंशिक क्षति भएको छ ।
निमित्त प्रमुख जिल्ला अधिकारी हिराधन राईका अनुसार पदमशेर राईको हार्डवेयर पसल सहितको घर, प्रकाशचन्द्र गिरीको होटल हलेसी दर्शन रेष्टुरेन्ट सहितको घर, ऐराख राईको कल्याण होटल सहित घर पूर्ण रूपमा जलेर नष्ट भएको छ । यसबाहेक भरण राईको पारुहाङ होटल र घरमा पनि आंशिक क्षति पुगेको राईले सुनाए । विस्तृत क्षति विवरण भने आउन बाँकी रहेको राईले जनाएका छन् ।
आगो करिब साडे तीन घण्टापछि साडे १० बजेतिर नियन्त्रणमा आएको निमित्त प्रजिअ राईले बताए । आगो नियन्त्रणमा रणभीम गण मुढे ब्यारेक, सशस्त्र प्रहरी बल ७ नम्बर हलेसी गुल्म, नेपाल प्रहरी, जिल्ला प्रशासन, स्थानीय तह, स्थानीय लगायत गरी करिब पाँच सय जना खटिएको राईले सुनाए । दमकल नभएपछि आगो नियन्त्रणका लागि ट्याक्टर, ट्याङ्कर, भाँडाकुँडा लगायतबाट समेत पानी ओसारेर प्रयोग गरिएको राईले जनाए ।
हलेसी तुवाचुङ नगरपालिकामा दमकल नभएकाले आगो नियन्त्रणमा समस्या भएको हलेसी तुवाचुङ नगरपालिकाकी प्रमुख विमला राईले बताएकी छन् । दिक्तेल रूपाकोट मझुवागढी नगरपालिकाको दमकल पनि बिग्रेको र ओखलढुङ्गाको दमकल चलाउने ड्राइभर पनि नभएपछि उदयपुर कटारी र भोजपुर नगरपालिकाको दमकल मगाइएको थियो । तर आगो नियन्त्रणभएपछि रोकिएको राईले जनाएकी छन् । आगलागीमा मानवीय क्षति भने भएको छैन । तर नियन्त्रणका क्रममा थुप्रैलाई चोट लागेको निमित्त प्रजिअ राईले बताएका छन् ।
