रूपाकोट संवाददाता–
खोटाङ, पुस ६–ऐतिहासिक मझुवागढीमा पुरातत्व विभागको बजेटबाट निर्माण गरिएको पदमार्गको सिंढी मापदण्ड विपरित भएको भन्दै स्थानीयले गुनासो गरेका छन् । पुरातत्व विभागको बजेटबाट निर्माण गरिएको पदमार्गको सिंढी सिमेन्ट प्रयोग गरेर बनाइएको भन्दै त्यसलाई भत्काएर मापदण्ड अनुसार पुनःनिर्माण गर्नु पर्ने स्थानीयले गुनासो गरेका हुन् ।
पुरातत्व विभागकै बजेटबाट कालिका भगवतीक्षेत्रदेखि मझुवागढीसम्म जाने पदमार्गको सिंढीमा सिमेन्ट प्रयोग गरिएकाले त्यसलाई भत्काएर पुनःनिर्माण गर्नु पर्ने दिक्तेल रूपाकोट मझुवागढी नगरपालिका–५ लफ्याङका किसन राईको भनाई छ ।
उक्त सिंढी निर्माणका लागि पुरातत्व विभागको आर्थिक वर्ष २०८०÷८१ मा १९ लाख ९७ हजार तीन सय ९२ रूपैयाँको लागत स्टिमेट भए पनि युनिक निर्माण सेवा खोटाङले ११ लाख ८४ हजार पाँच सय ६० रूपैयाँमा सम्पन्न गर्ने गरी ठेक्का पारेर काम गरेको पुरातत्व विभाग योजना शाखाका अधिकृत पुरुषोत्तम आचार्यले बताएका छन् । डिटेल स्टिमेट, टेण्डर आह्वान र कार्य सम्पन्नपछि मुल्याङकन गरी भुक्तानी पनि पुरातत्व विभागले नै गरेको आचार्यले जनाएका छन् ।
मङ्सिर १९ गते मझुवागढीमा भएको सर्वपक्षीय सर्वदलीय भेलामा राजनीतिक दलका प्रमुख तथा प्रतिनिधिहरू, सरोकारवालाहरूले मझुवागढी क्षेत्रमा मापदण्ड विपरित विभिन्न संरचना निर्माणले गढीको अस्तित्व संकटमा परेको भन्दै भेलामा उपस्थित प्रमुख जिल्ला अधिकारी शिवकुमार कार्कीलाई ध्यानाकर्षण गराएका थिए । मेवाखोला दोभान साप्सु कालिका देविथान लिफ्टिङ खानेपानी योजनाको ट्याङ्की गढीको बङ्करभित्रै बनाइएको, सशस्त्र प्रहरी बल हलेसी गुल्मले गढीको क्षेत्र अतिक्रमण गरेको र पुरातत्व विभागले निर्माण गरेको कङ्क्रिटको सिंढीले मझुवागढीको अस्तित्व संकटमा परेको गुनासो गरेका थिए ।
तर प्रजिअले यसबारे बेवास्ता गरेको भन्दै स्थानीयले गुनासो गरेका छन् । प्रमुख जिल्ला अधिकारी शिवकुमार कार्कीले भने लिखित रूपमा नआएकाले केही नगरिएको बताएका छन् । दिक्तेल रूपाकोट मझुवागढी नगरपालिकाका प्रवक्ता दिनेश घिमिरेले पुरातत्व विभागले नगरपालिकासंग समन्वय नगरी मझुवागढीको सिंढी निर्माण गरेको बताएका छन् ।
निर्माणमा संलग्न फडिन्द्र आचार्यले स्टिमेट अनुसारै बनाइएको दाबी गरेका छन् ।
