रूपाकोट संवाददाता–
खोटाङ, मङ्सिर ३–दिप्रुङ चुइचुम्मा गाउँपालिकामा निर्माणाधीन करोडौंको सिंचाइ कुलो योजना अलपत्र परेको छ । निर्माण कम्पनीको गैरजिम्मेवारपनले उक्त गाउँपालिका–६ छितापोखरीस्थित टुवाखेला मुहानको ‘लोकतान्त्रिक सिंचाइ कुलो योजना’ निर्माणाधीन चरणमै अलपत्र परेको हो ।
कोसी प्रदेश सरकार खानेपानी सिंचाइ तथा उर्जा मन्त्रालय विराटनगरको आठ करोड ८४ लाख २३ हजार ६ सय १६ रूपैयाँको लागतमा २०७८ पुस २३ गते सक्ने गरी स्काइ–विवश–रामसागर जेभीले २०७६ असार २३ गते संझोता गरेको थियो । तर निर्माणअवधिमा नसकेपछि दुई चोटी म्याद थप भइसकेको छ । स्थानीयको अवरोधको बाहना बनाउदै २०७९ असार २३ गते कोसी प्रदेश खानेपानी सिचाइ तथा उर्जा मन्त्रालय विराटनगरमा २०८० असार २१ गतेसम्मका लागि म्याद थपेको थियो । त्यसअवधिमा पनि काम नसकेपछि फेरि २०८० असार २२ गते २०८१ चैत १६ गतेसम्मका लागि म्याद थपेको सिचाइ डिभिजन कार्यालय खोटाङका प्रमुख महेश यादवले बताए । बेलामा काम नसक्दा योजनाको लागत बढेर १० करोड ९ लाख १३ हजार पुगेको यादवले सुनाए ।
उक्त योजना अन्तरगत १३ किलोमिटर लामो पाइप लाइनमध्ये आठ किलोमिटर मात्र काम सम्पन्न भएको छ । उक्त योजनाको भौतिक प्रगति ७० र वित्तीय प्रगति ६८.६७ प्रतिशत मात्र छ । उक्त योजनाको अन्तिम पटक थपिएको म्याद भित्र नसके कारबाहीको प्रक्रियामा जाने यादवले जनाए ।
उक्त ठेक्कामा संलग्न रामसागर निर्माण कम्पनीका प्रोप्राइटर राम पौडेलले भने स्थानीयको अवरोधका कारण काममा समस्या आएको बताएका छन् । गाउँपालिका अध्यक्ष लोकेन्द्र राईले भने उक्त योजनाको काम गुणस्तरहीन भएपछि स्थानीयले विरोध जनाएको बताएका छन् । उक्त योजनाले दिप्रुङ चुइचुम्मा गाउँपालिका–४ बतासे, ५ सप्तेश्वर छितापोखरीको तल्लो भागमा सिचाइ सुविधा पुग्ने गरी निर्माण थलिएको थियो ।
उक्त योजना अलपत्र परेपछि तत्काल सञ्चालनको माग गर्दै स्थानीयले विभिन्न निकाय समक्ष माग गरेका छन् । जिल्ला प्रशासन कार्यालय, जिल्ला समन्वय समिति खोटाङमा ज्ञापनपत्र बुझाएका हुन् । उक्त ज्ञापनपत्रमा विभिन्न राजनीतिक दलमा आवद्ध स्थानीयले हस्ताक्षर गरेका छन् । कांग्रेस नेता केशव कार्की, एमाले खोटाङका पूर्वअध्यक्ष रामप्रसाद दङ्गाल र माओवादी केन्द्र खोटाङका संयोजक दीपक पाण्डेले संयुक्त हस्ताक्षर गरेको छन् ।
